jump to navigation

சென்னை புத்தகக் கண்காட்சி 2008 ஜனவரி 7, 2008

Posted by M Sheik Uduman Ali in Articles.
Tags: , , , , ,
add a comment

முப்பத்தியோராவது புத்தகக் கண்காட்சி இந்த வருடம் திடீர் மழையோடு ஆரம்பித்துள்ளது. டிசம்பர் இசைத் திருவிழா என்றால் ஜனவரியை புத்தகத் திருவிழா என்று அழைக்கலாம். இ-புக், இ-புக் ரீடர், மொபைல் புக் ரீடர், இன்டர்நெட்டில் விக்கி என எத்தனையோ மின்ணணு ஊடகங்கள் புத்தங்களுக்கு (அல்லது static content) புதிய வடிவம் கொடுத்தாலும் அச்சுப் புத்தகங்கள் கொடுக்கும் செளகர்யங்களையும், நெருக்கத்தையும் அவை கொடுக்கவில்லை என்பது இத்திருவிழாவிற்கு சென்னை வாழ் மக்களின் பரவாலான ஆதரவை வைத்தே அறியலாம். வேண்டுமென்றால் வரும் தலைமுறைகளின் ஆர்வம் இன்டராக்டிவ் பப்ளிஷ்களலால் மாறலாம்.

புதிதாக வாங்கிய புத்தகம் புது மனைவி மாதிரி. நிறைய மணக்கும், நெருக்கத்தில் பரபரப்பு கொடுக்கும். உள்ளே இருக்கும் பொருளடக்கம் சிறப்பாக இருந்தால் வாசிப்பு அலாதியாகவும் போதை தருவதாகவும் இருக்கும். நாளான புத்தகமோ, அழுக்கேறியிருந்தாலும் பக்குவமாகவும் பாந்தமாகவும் இருக்கும். சரி விசயத்திற்கு வருவோம். இந்த வருடமும் ஏராளமான கடைகள், புதிய புத்தக வெளியீடுகள் என வெகு ஜோராக இருந்தன.

இந்தக் கண்காட்சியின் தளம் தமிழகம் சார்ந்து இருப்பதால் பெரும்பாலான வெளியீடுகள் தமிழ் கவிதைகள் கட்டுரைகளே ஆகும்.

விகடன் பிரசுரத்திற்கு டிமாண்ட் இருப்பது தெரிகிறது. அவர்களின் சந்தைப்படுத்தும் முறையும் சிறப்பாக இருக்கிறது. பல கடைகளில் விகடன் பிரசுரங்கள் கிடைத்தாலும் அதற்கான ஸ்டால் ஒரு சிறிய கடை என்பதால் கூட்டங்களுக்கிடையே புத்தங்களை தொடக்கூட முடியவில்லை. இந்த வருடம் “Prodigyயின் இருபத்தைந்து ரூபாய் மதிப்புள்ள குட்டி புத்தங்கள் கண்களை கவர்ந்தன. எல்லாமே காம்பேக்ட் வடிவில் சொற்களை குறைத்திருந்தாலும் சுவாரஸ்யம் குறையாமல் “சிவாஜி, “ஒளரங்கசீப், “எடிசன் தொடங்கி, சினிமாவிற்கு பின்னால், உலக சுகாதரத்துறையின் குழந்தைகளுக்கான மனவியல் குறித்த வெளியீடுகள் சிறப்பாக இருக்கிறது.

இந்தக் கண்காட்சியில் நிறைய விற்ற புத்தங்கள், துறைகள் பற்றிய புள்ளி விவரங்கள் இனிமேல் தான் தெரியும் என்றாலும் கடந்தாண்டு நம் மக்கள் சுய உதவி குறித்த புத்தகங்களை நிறைய வாங்குவது பேஷனாக இருந்தது. இந்தாண்டு கண்ணதாசன் பதிப்பகத்தின் தரமான சுய உதவி வெளியீடுகளுக்கு நிறைய கூட்டங்கள்.

ஐடியை பொறுத்தவரை தனி ஸ்டால் ஏற்படுத்தி கவர்ந்தவர்கள் வெய்லி ட்ரீம் டெக் மற்றும் ஷ்ராஃப் பப்ளிஷர்ஸ். வாழ்த்துக்கள். மற்ற இடங்களில் மிகவும் பரவலாக பயன்படுத்தும் புத்தகங்களே குறைவாகத்தான் இருந்தன.

அச்சுபிரதிகளுக்கு இணையாக சிடிக்களும் தமிழில் நிறைய வந்துள்ளன.

ஆன்மிகத்தை பொறுத்தவரை இந்து மற்றும் இஸ்லாமிய வெளியீடுகளுக்கான ஸ்டால்கள் நிறைய இருந்தன. ஆச்சர்யமான விசயம் மிகமிகக் குறைவான கிருஸ்தவ வெளியீடுகள். அதைவிட ஆச்சர்யம் தனியான ஸ்டால்கள் ஏதுமில்லாதது. கவர்ந்த விசயம் ஆன்மிகப் பதிப்புகளின் நவீனம். அச்சுத் தரம் மற்றும் வடிவமைப்பில் மட்டுமில்லாது தலைப்புகளிலும். இவைகளுக்கு நிகராக பகுத்தறிவு மற்றும் மார்க்ஸிய பாசரைகளுக்கான ஸ்டால்கள் கவர்ந்தன. கடவுளைப் பற்றிய தர்க்க ரீதியான புத்தங்கள் நிறைய என்றாலும், உலகமயமாக்கல், இந்திய சட்டங்கள் பற்றிய விழிப்புணர்வுகள், குஜராத் இனப்படுகொலைகள் பற்றிய வெளியீடுகளும் நிறைய இருந்தன.

கான்டீனை ரொம்பவும் தள்ளி அமைத்திருக்கிறார்கள். நாங்கள் உட்பட பலருக்கும் அது இருப்பது கூட தெரியவில்லை. ஜூஸ், கார்ன், சான்ட்விச் உட்பட ஒரு பாஸ்ட்புட் கடை என காம்பேக்டாக வைத்திருந்தார்கள். தரம் நன்று.

காஞ்சி சங்காராச்சாரியார்களின் ஆன்மிகம் பற்றிய புத்தகம் ஒரு பக்கம் என்றால், காஞ்சி மடத்தை தாறுமாறாக விமர்சிக்கும் புத்தகமும் அதே வரிசையில். இரண்டையும் வாங்கும் மக்கள். வெவ்வேறான கருத்துகள், நம்பிக்கைகள், துறைகள் சார்ந்த இம்மக்களை ஒரே இடத்தில் இணைக்கும் வசீகரம் “புத்தகம்.

வாழ்க வாசிப்பு.